Молитва свщмуч. митрополита Iосифа Петроградскаго о Святей Церкви

О, Премилосердый, Всесильный и Человеколюбнейший Господи Иисусе Христе Боже наш, Церкве Зиждителю и Охранителю, воззри благосердым оком Твоим на Церковь Православную, люте обуреваемую напастей бурею. Ты бо рекл еси Господи: созижду Церковь Мою и врата адова не одолеют Ей. Помяни обещание Твое неложное: се Аз с вами есмь во вся дни до скончания века. Буди с нами неотступно, буди нам милостив, молит Тя многострадальная Церковь Твоя. Укрепи нас в правоверии и любви к Тебе благодатию и любовию Твоею, заблуждающия обрати, отступльшия и ожесточенныя умягчи: всякое развращение и жизнь, несогласную христианскому благочестию, исправи. Сотвори, да вси свято и непорочно поживем, и тако спасительная вера укоренится и плодоносна в сердцах наших пребудет. Не отврати лица Твоего от нас, не до конца гневающийся Господи! Воздаждь нам радость спасения Твоего, отри слезу от очей плачущих, всякую нужду и скорбь людей Твоих утоли. Огради нас всемогущею силою Твоею от всяких напастей, гонений и озлоблений, изгнаний и заключений. Тобою спасаеми, достигнем пристанища Твоего Небеснаго, и тамо с лики Честнейших Небесных Сил прославим Тебе, Господа и Спасителя нашего, со Отцем и Святым Духом, во веки веков, Аминь.